Ahmad Yassaviy

Ahmad Yassaviy hayoti​
Ahmad Yassaviy 1103-yilda Sarom (Sayram) qishlog‘ida Shayx Ibrohim xonadonida dunyoga keladi. Keyinchalik u o‘z ona yurtini asarlarida “Ul muborak Turkiston” deb tilga oladi. Yassaviy tug‘ilganidan so‘ng, ko‘p o‘tmay onasi – Muso Shayxning qizi Oysha xotun olamdan o‘tadi. Yetti yoshida esa otasi vafot etadi. Kichik Ahmadning tarbiyasi opasi Gavhar Shahnoz zimmasiga tushadi.​
Opasi bilan Yassi shahriga ko‘chib o‘tishgach, Ahmad dastlabki ta’limotni Yassida mashhur olim Shahobiddin Isfijobiydan oladi. So‘ngra u yerdagi bir qator tolibi ilmlar kabi Arslon bobo qo‘lida tarbiya va tahsil oladi. Aynan shu shaharda Yassaviy botin ilmi sirlarini mukammal o‘zlashtiradi. O‘sha zamonlarda Movarounnahrning ilm-ma’rifat markazlaridan bo‘lgan Buxoroda ko‘plab turkistonlik toliblar yig‘ilishgan. Ustozi Arslon bobo ko‘rsatmasi bilan Yassaviy ham Buxoroga yo‘l oladi.