Biznes reja quyidagi tarkibiy qismlarni o’z ichiga oladi:
1. Loyihaning maqsadi
2. Loyihaning qiymati
3. Tashkiliy reja
4. Ishlab chiqarish rejasi
5. Moliyaviy reja
6. Xulosa
LOYIHANING MAQSADI
Ushbu loyixani amalga oshirishdan maqsad, baliqchilik biznesini tashkillashtirishni asoslashdir.
Tadbirkor belgilangan faoliyat turiga asoslanib, 3 turdagi baliqlarni sotib olib, yetishtirib, go’shtidan xalqimizga arzon va sifatli tarzda, yetkazib berish xamda 4 nafar kishini ish bilan ta’minlashni o’z oldiga maqsad qilib qo’ygan.
Jahon sog’liqni saqlash tashkiloti tavsiyasiga ko’ra, tibbiyot me’yorlariga asosan bir kishi bir yilda 12 kilogrammdan kam bo’lmagan miqdorda baliq iste’mol qilishi kerak. Ko’pgina davlatlarda bu ko’rsatkich birmuncha yuqori, ya’ni 16,6 kilogrammgacha yetadi. Afsuski, O’zbekistonda mazkur raqam o’rtacha 3 kilogrammni tashkil etadi.
Shu bois, mamlakatimizda ayni paytda mazkur tarmoqda tub islohotlar boshlandi. Avvalo, shuni qayd etish lozimki, mamlakatimiz Prezidentining 2018 yil 6 noyabrdagi “Baliqchilik sohasini yanada rivojlantirishga doir qo’shimcha chora-tadbirlar to’g’risida”gi qarori tarmoq rivojida muhim ahamiyat kasb etib, keng imkoniyatlar eshigini ochdi. Shuningdek, respublikamizda birinchi marta baliqchilik sohasini rivojlantirishning huquqiy tizimi to’liq shakllandi. Ichki bozorni sifatli va arzon baliq mahsulotlari bilan to’ldirish masalasi ustuvor vazifa qilib qo’yilgan.
Statistika ma’lumotlariga ko’ra, bugungi kunda jahonda yiliga jami 96 million tonna “luqmai halol” yetishtiriladi. O’zbekistonda esa bu ko’rsatkich yiliga 450 tonnani tashkil qiladi. Baliqchilik sohasi bo’yicha ishlab chiqilgan dasturga muvofiq, hozir mamlakatimizda Rossiya, Vengriya, Vetnam davlatlari bilan baliq chavoqlarini yetishtirish va yangi ko’llarda baliq parvarish qilish bo’yicha hamkorlik loyihalari amalga oshirilmoqda. Shuningdek, Andijon, Jizzax, Qashqadaryo, Namangan, Samarqand, Surxondaryo va Farg’ona viloyatlarining tog’oldi hududlarida farel va osyotr kabi baliq turlarini yetishtirish bo’yicha ishlar olib borilyapti.
