Konstitutsiyaviy huquq – ijtimoiy tuzum va davlat organlari tizimini, shaxsning mavqeyini, davlat hokimiyatini amalga oshirishda yuzaga keladiga ijtimoiy munosabatlarni boshqarib turuvchi huquqiy me’yorlar majmuini o’z ichiga oladi. Konstitutsiyaviy huquq birinchi navbatda ijtimoiy tuzum asoslarini mustahkamlaydi. Ma’lumki, har bir davlatning negizi uning ijtimoiy tuzumi bilan bog’liq. Shuning uchun davlatning Asosiy Qonuni eng avvalo ijtimoiy tuzumni tartibga solish maqsadini ko’zlaydi. Ijtimoiy tuzum xususiyati – oliy hokimiyat kimga qarashli ekanligi, kim uni amalga oshirishi, mulkchilik shakllari, turlarini, ijtimoiy guruhlar o’rtasidagi munosabatlar qanday shakllanishini o’z ichiga oladi.
O’zbekiston Respublikasi Konstitutsiyasida ham yuqorida ko’rsatilgan masalalar o’z ifodasini topgan. Respublikamiz Konstitutsiyaviy huquq me’yorlarida xalqning maqsadlari, fuqarolarning faoliyatlari huquqiy asoslangan. Konstitutsiyaviy huquq respublikadagi barcha huquqiy me’yorlarning yetakchi tarmog’i hisoblanadi. Hamma huquqiy me’yorlar undan kelib chiqadi va unga bo’ysunadi.
Yuridik fanning har bir sohasi jamiyatning, davlatning ma’lum bir tuzilishini o’rgatishni maqsad qilib olgan bo’lsa, Konstitutsiyaviy huquqning o’rganish doirasi bundan kengroq. Bu fan ijtimoiy munosabatlarni tartibga solish jarayonida davlat suverenitetini, xalq hokimiyatchiligini, Konstitutsiya va qonun ustunligini, respublikamiz tashqi siyosatini, inson va fuqarolarning asosiy holatini, respublikaning ma’muriy-hududiy tuzilishini, davlat hokimiyatining tashkil etilishini, ularning vakolatlarini, faoliyat tartiblarini o’z ichiga oladi.
«Konstitutsiya» so’zi lotin tilida «Constitutio» – so’zidan kelib chiqib «tuzish», «o’rnatish», «belgilash» degan ma’nolarni bildiradi. Jamiyatdagi ijtimoiy munosabatlarni qonun asosida belgilash dastlab qadimgi Rimda amalda oshirilganligi tarixdan bizga ma’lum.
