Korxonalarni tashkil qilish tartibi

Fuqarolar mulkiga asoslangan kichik korxonalar tuzish, ro’yxatga olish, ularning faoliyati va ularni tugatishning huquqiy holati O’zbekiston Respublikasining «Tadbirkorlik faoliyati erkinligining kafolatlari to’g’risida»gi qonuni, «O’zbekiston Respublikasida xususiy tadbirkorlik to’g’risida»gi nizom va respublikamizning boshqa qonun hujjatlari bilan belgilanadi.
Ishlab chiqarish kooperativlari shaklidagi kichik korxonalarning huquqiy holati respublikaning kooperatsiya to’g’risida qonun hujjatlari bilan belgilanadi.
Xorijiy investisiyalar bilan kichik korxonalarni tashkil qilish va uning faoliyati bilan bog‘liq munosabatlar O’zbekiston Respublikasining «O’zbekiston Respublikasida tashqi iqtisodiy faoliyat to’g’risida»gi va O’zbekiston Respublikasida xorijiy investisiyalar bilan korxonalar, xalqaro birlashmalar, shuningdek, ularning tarkibiy bo’linmalarini tuzish tartibi, ularning faoliyat ko‘rsatishi, ularni davlat ro’yxatiga olish to’g’risida nizomlar, respublikaning boshqa qonunchilik va normativ hujjatlari bilan belgilanadi.
Mulkning aralash shakllari asosida kichik korxonalarni tashkil qilishda korxonalarning turi mazkur korxonani tashkil qilgan mulkdorlarning mulkiy ulushi salmog‘iga ko‘ra belgilanadi.
Quyidagilar kichik korxonalarning ta’sischilari bo‘lishlari mumkin: O’zbekiston Respublikasi fuqarolari, respublika hududida yashovchi fuqaroligi bo‘lmagan shaxslar, birgalikda xo‘jalik yurituvchi oila a’zolari va fuqarolar guruhi; davlat korxonalari, ijarachi korxonalar, jamoa korxonalari va qo‘shma korxonalar, xo‘jalik jamiyatlari va shirkatlari, ishlab chiqarish va matlubot kooperativlari, xo‘jalik birlashmalari (assosiasiyalar, kompaniyalar, konsernlar, konsorsiumlar va hokazolar), jamoat birlashmalari va diniy tashkilotlar, xayriya jamg‘armalari va boshqa jamg‘armalar, yuridik shaxs bo‘lgan boshqa korxonalar va tashkilotlar; davlat mulkini boshqarish vakolatiga ega bo‘lgan boshqa davlat organlari; xorijiy yuridik shaxslar va fuqarolar, fuqaroligi bo‘lmagan shaxslar.