Ma’muriy javobgarlik – aybdorga nisbatan ma’muriy huquq normalarida ko‘zda tutilgan doirada jazo qo‘llash.
Ma’muriy javobgarlik yuridik javobgarlikning bir turi bo‘lib, quyidagi xususiyatlarga ega:
– davlat faoliyatining turli xil sohalarida sodir etilgan ma’muriy huquqbuzarliklar uchun qo‘llanilishi;
– vakolatli organlar, mansabdor shaxslar aybdor shaxslarni davlat qonunlari va qarorlari asosida javobgarlikka tortishlari;
– ma’muriy javobgarlikka tortilganlar sudlangan hisoblanmasliklari;
– engil jazo berilishi va qisqa jazo muddati belgilanishi;
– moddiy javobgarlikdan farqli ravishda ma’muriy javob-garlikning moddiy zarar yetkazilmagan taqdirda ham qo‘l-lanilishi.
Ma’muriy huquqbuzarlik sodir etgan shaxslar 16 yoshga to‘lgan paytdan boshlab ma’muriy javobgarlikka tortiladilar. 16 yoshdan 18 yoshgacha bo‘lgan shaxslarga nisbatan voyaga yetmaganlar ishi bilan shug‘ullanuvchi komissiyalar to‘g‘risidagi nizomda ko‘zda tutilgan choralar qo‘llaniladi. Bu shaxslar Ma’muriy javobgarli to‘g‘risidagi kodeksning 61, 125–136, 183–185, 194, 218, 220, 227-moddalarida nazarda tutilgan ma’muriy huquqbuzarliklarni sodir etgan taqdirda, ular umumiy asoslarda ma’muriy javobgarlikka tortiladilar. Sodir etilgan huquqbuzarlikning xususiyatlarini hisobga olgan holda mazkur shaxslarning ishlari odatda voyaga yetmaganlar ishi bilan shug‘ullanuvchi komissiyalarga berilishi mumkin (Kodeksning 194-moddasida nazarda tutilgan huquqbuzarlikni sodir etgan shaxslar bundan mustasno). Kodeksning 61-moddasida nazarda tutilgan huquqbuzarlikni sodir etgan shaxslarning ishlari esa yuqoridagi komissiyalarga berilishi lozim. O‘n olti yoshdan o‘n sakkiz yoshgacha bo‘lgan voyaga yetmaganlar qonun hujjatlarida nazarda tutilgan boshqa hollarda ham umumiy asosda javobgarlikka tortilishi mumkin.
