Ma’muriy-prosessual normalar va ma’muriy- prosessual munosabatlar

Ma’muriy-prosessual norma jamiyatimizdagi yuridik qoidalarning bir turi bo’lib, ular moddiy normalar bilan chambarchas bog’liqdir. Ma’muriy-prosessual normalar moddiy normalarni qo’llash usulini belgilaydi. Bunday normalar davlat tomonidan o’rnatiladi va ularni qo’llashga ruxsat beriladi. Ma’muriy-prosessual normalar davlat boshqaruvida qo’llaniladi. Moddiy huquqiy normalar ma’muriy huquq sub’ektlarining huquq va burchlarini belgilab bersa, ma’muriy-prosessual normalar ma’muriy huquq sub’ekti o’z huquq va burchini qanday tartibda amalga oshirishi mumkinligini ko’rsatadi.
Ma’muriy-prosessual normalar boshqa sohadagi prosessual normalardan farq qiladi. Jumladan fuqarolik-prosessual normalar va jinoyat-prosessual normalar davlatning oliy organlari tomonidan maxsus qonunlar yordamida o’rnatiladi. Ma’muriy-prosessual normalar esa, davlat oliy organlari bilan bir qatorda, ijro etuvchi va farmoyish beruvchi organlarning hujjatlari yordamida belgilanishi mumkin, shuningdek, fuqarolik-prosessual normalarni, jinoyat prosessual qonunda ko’rsatilgan sub’ektlargina qo’llashi mumkin, ma’muriy-prosessual normalarni esa hamma davlat boshqaruv organlari (mansabdor shaxslari) o’z vakolatlari doirasida qo’llashlari mumkin. Fuqarolik-prosessual hamda jinoyat-prosessual normalar asosida ko’pincha majburlov choralari qo’llaniladi. Ma’muriy-prosessual normalarni qo’llash paytida esa hamma vaqt ham majburlov choralari qo’llanilavermaydi.
Ma’muriy-prosessual normalar davlat boshqaruvi jarayonida ijtimoiy munosabatlarni tartibga soladi. Bu o’rinda shuni alohida qayd etish lozimki, ma’muriy-prosessual normalar davlat boshqaruvidagi barcha munosabatlarni emas, balki davlat boshqaruv organlarining yakka tartibdagi ishlarini ko’rib chiqish faoliyatida yuzaga keladigan munosabatlarnigina tartibga soladi.