O‘q otilish masofasi – qurol mili og‘zidan to to‘siqdagi jarohatning kirish teshigigacha to‘g‘ri chiziq bo‘yicha bo‘lgan masofa. Masofaga bog‘liq ravishda taqab turib otish, yaqin masofadan otish va uzoq masofadan otish turlari farqlanadi.
Taqab turib o‘q otish deyilganda, qurol mil og‘zi to‘siqqa tegib turgan holatdagi o‘q otilishlar tushuniladi. Bu holda qurol to‘siqqa mahkam taqalishi (zich taqab turib otish) yoki yengilgina, birorta burchak ostida tegib (qisman taqab turib otish) turishi mumkin.
Taqab turib o‘q otilishning alomatlari quyidagilar hisoblanadi: qurumlanishning kichik sohasi, to‘siqning katta buzilishlari, qurol mili og‘zining aksi, jarohat kanalida pijlar, moylash izlari, qurumning mavjudligi va boshqalar. Teshik atrofida qurumning o‘tirib qolishi qurolning holatiga qarab turlicha bo‘ladi. Zich taqab turib otishda qurum kengligi 0,5 sm li ingichka aylana shaklida o‘tirib qoladi, qisman taqab otishda yoki burchak ostida taqab turib otishda nosimmetrik shakldagi diametri 5 sm gacha bo‘lgan dog‘ shaklida o‘tirib qoladi. Qurumning kirish teshigining chetlarida o‘tirib qolishi, hatto zich taqab turib o‘q otishda ham, qurolni orqaga tepishi sababli yuz beradi.
Yaqin masofadan o‘q otish deyilganda, kirish teshigi atrofida qurol mili og‘zida yuz beradigan hodisalar ta’sirining izlari kuzatiladigan o‘q otilishlari tushuniladi. Yaqin masofadan o‘q otilish izlari quyidagilar: yonmagan porox zarralari, qurum tarkibida mavjud metallar va ular birikmalarining o‘tirib qolishi va hokazo
