O’qituvchi faoliyatidagi qiyinchiliklarni aniqlash va ularni bartaraf qilishda pedagogik tashxisning o’rni

Hozirgi taraqqiyot nuqtai nazaridan biz inson faoliyati, mehnati hamda uni tashkil qilishni tahlil etadigan bo’lsak, bu sohada ancha bilim va tajribaga ega ekanligimizga ishonch hosil qilamiz. Bu inson faoliyatini tashqil qilish darajasi, ijtimoiy-iqtisodiy taraqqiyotning tezlashuviga katta ta’sir ko’rsatadi. Taraqqiyot tezlashuvi esa, uni tashkil qilishga yuqori talab qo’yadi. Insonning o’z faoliyatini to’g’ri, tejamli tashkil qilishi o’zi uchun ham, u bilan birgalikda yashaydigan, ishlaydiganlar uchun ham qulaylik tug’diradi. Inson ma’lumot darajasining oshishi o’z-o’zidan uning faoliyatini samarali tashkil qilishga olib kelmaydi. Bunda kishilarni yoshligidan, o’qish va mehnat davrida, tajriba hamda maxsus metodlar bilan o’rgatish lozim.
Jamiyat hayotida ijtimoiy salmog’i jihatidan o’qituvchi faoliyati va mehnati alohida ahamiyatga ega. O’qituvchi mehnatining o’ziga xosligi – ko’p qirraliligi va murakkabligidadir. Shu bilan bir qatorda, o’qituvchi mehnati ijodiy xarakterga ega. Uning ijodiy xarakteri faqat yangilik yaratishida emas, balki mehnat ob’ekti – o’quvchi shaxsining murakkab va o’zgaruvchanligidadir.
Har bir on, vaziyat, o’qituvchilar bilan muloqot ma’lum ma’noda bir-biriga o’xshamasligi, takrorlamasligi bilan ijodiydir.
O’quvchi mutassil tarzda jismoniy, ruhiy, aqliy o’zgarishda bo’ladi. O’qituvchi mehnatining bunday murakkabligi va qiyinchiligi o’quvchi bilan muloqotga kirishish, unga ta’sir ko’rsata olish usul va vositalarini bilishini taqozo qiladi.
O’qituvchi mehnatining natijasi faqat o’z faoliyatini tashkil qilish va boshqarish darajasi bilan emas, balki o’quvchi shaxsi va faoliyati xususiyati hamda uni boshqara bilishiga ham bog’liqdir.