O’qituvchilar malakasini oshirish sifati va me’yorlarini aniqlash metodikasi

Malaka oshirishning barcha bo’g’inlari, jumladan, kurs mashg’ulotlarining ham asosiy maqsadi tahsil oluvchilarga nafaqat mashg’ulot o’tish, bor bilimlarni tayyor holda berishdan iborat, balki ularni ijodiy fikrlash, doimiy ravishda bilish qobiliyatlarini o’stirish, o’z mahoratlarini muntazam oshirish mayllari, chuqur, tizimli, tahliliy, ijodiy izlanishlarini kurs va kursdan keyingi davrda rivojlantirishni taqozo qiladi. Bu jarayon o’ta muhim va murakkab bo’lib, ilmiy asosda to’la yechilgan masala emas.
Yechilishi lozim bo’lgan muhim muammolardan yana biri, malaka oshirish tizimi uchun uning natijasi yoki ta’sirchanligini aniq belgilab beruvchi metodika va mezonlarning yo’qligidir. Mamlakatimizda va chet ellarda bu borada bir qator urinishlar amalga oshirilgan. Shunday urinishlardan biri, tinglovchilar bilim darajasidagi o’zgarishlarni aniqlashdan iboratdir. Bu boradagi ijobiy tajriba Bolgariyada korxona rahbarlari malakasini oshirishda to’plangan tajriba mavjud. Butun Bolgariyada kurslarda mashg’ulotlarni boshlashdan olti oy oldin test topshiriqlari anketa tarzida yuborilib, tinglovchilar tarkibi aniqlanadi. Topshiriq natijalari hisoblash mashinalari yordamida ishlanib, topshiriqlarga yetarli javob bermaganlar aniqlanadi. Shartli ravishda bu birinchi tur bo’lib, savollarga yetarli javob berolmaganlar malaka oshirish kurslaridagi da’vogarlar tarkibidan chiqariladi. Anketa savollari bo’yicha bir turda sinovdan o’tganlarga mashg’ulotlar boshlanishidan 3 oy oldin o’quv-mavzuiy reja, adabiyotlar ro’yxati, bitiruv ishi mavzusi va kirish sinov savollari yuboriladi. Shu asosda kursga keluvchilar bilimi dastlabki sinovdan o’tkaziladi. Bunda xat orqali yuborilgan anketa savollariga tasodifiy javob bergan va dastlabki kirish imtihonidan o’tolmaganlar kursga qabul qilinmaydi.