Qadriyat tushunchasining ma’nosi va uning umumiy tavsifi

«Qadriyat» tushunchasi – juda keng tushuncha. Uning bir qismi ma’naviy qadriyatlardir. Milliy ma’naviy qadriyatlar “milliylik”, “ma’naviyat” va “qadriyat” tushunchalari kesishgan nuqtada jamlangan ijtimoiy hodisalarni o‘z ichiga oladi.
Qadriyat – borliq va jamiyat, voqelikdagi muayyan narsalar, voqealar, hodisalar, inson hayoti, moddiy va ma’naviy boyliklarning ijtimoiy-axloqiy, madaniy-ma’naviy ahamiyatini ko‘rsatish uchun qo‘llaniladigan tushuncha. Ko‘pgina hollarda kishilar qimmatbaho buyumlarni qadriyat deyishadi. Aslida esa qadriyat so‘zining ma’nosi boshqacharoq. Masalan, ming yillar ilgargi buyumning bugungi kun uchun moddiy jihatdan bahosi arzimas bo‘lishi mumkin, negaki, uni hozir ishlab, undan foydalanib bo‘lmaydi. Ammo bobokalonlarimizdan bizgacha yetib kelgan moddiy va madaniy meros sifatida u buyum nihoyatda qadrli, ahamiyatli bo‘lishi mumkin.