Ma’muriy huquqbuzarlik to‘g‘risidagi ishni ko‘rib chiqish uchun tayyorlashda tegishli organ (mansabdor shaxs) quyidagi masalalarni hal etishi lozim:
1) mazkur ishni ko‘rib chiqish uning huquqiy doirasiga kiradimi?
2) ma’muriy huquqbuzarlik to‘g‘risidagi bayonnoma va ishga oid boshqa materiallar to‘g‘ri tuzilganmi?
3) ishni ko‘rishda qatnashuvchi shaxslar uni ko‘rib chiqish vaqti va joyi haqida xabardor qilinganmi?
4) zarur qo‘shimcha materiallar so‘rab olinganmi?
5) ma’muriy javobgarlikka tortilayotgan shaxs, jabrlanuvchi, uning qonuniy vakillari, advokat qilgan iltimoslar hal etilishi kerakmi?
Ma’muriy huquqbuzarlik to‘g‘risidagi ish bunday huquqbuzarlik sodir etilgan joyda ko‘rib chiqilishi kerak.
Ma’muriy javobgarlik to‘g‘risidagi kodeksning 119, 125–136, 139, 140- moddalarida nazarda tutilgan huquqbuzarliklar to‘g‘risidagi ishlar transport vositalarini hisobga olish joyida ham ko‘rib chiqilishi mumkin. 187-moddada nazarda tutilgan ma’muriy huquqbuzarlik to‘g‘risidagi ishlar shunday huquqbuzarlik sodir etilgan joyda yoki huquqbuzarning istiqomat joyida ko‘rib chiqiladi. Voyaga yetmaganlar ishi bilan shug‘ullanuvchi komissiyalar esa ishni huquqbuzarning istiqomat joyida ko‘rib chiqadi. Ma’muriy huquqbuzarlik to‘g‘risidagi ishni boshqa joyda ko‘rib chiqish qonunda nazarda tutilgan bo‘lishi mumkin.
Ma’muriy huquqbuzarliklar to‘g‘risidagi ishlar mazkur ishni ko‘rib chiqish vakolatiga ega bo‘lgan organ (mansabdor shaxs) tomonidan ma’muriy huquqbuzarlik to‘g‘risidagi bayonnoma va ishga oid boshqa materiallar olingan kundan boshlab, o‘n besh kunlik muddat ichida ko‘rib chiqilishi lozim.