“Biz Uchinchi Renessans masalasini strategik vazifa sifatida oldimizga qo‘yib, uni milliy g‘oya darajasiga ko‘tarmoqdamiz”
Sh.M.Mirziyoyev.
“Renessans” so‘zi – fransuzcha “Renaissonce”, italyancha – “Rinascimento” – qayta yuzaga kelmoq, yangidan tug‘ilmoq, qayta tirilish, uyg‘onish – degan maʼnolarni anglatadi.
“Uygʼonish” istilohi ilk bor XVI asrda meʼmor, musavvir va sanʼat tarixchisi Jorj Vazari (1511-1574) tomonidan G‘arbiy Yevropada burjua munosabatlari rivojlanishining dastlabki bosqichi bilan shartlangan tarixiy davrni tavsiflash uchun qo‘llanilgan. Ushbu istilohning hozir biz bildirgan maʼnosi farang tarixchisi Jyul Mishle (1798-1874) tomonidan XIX asrda joriy qilindi.
Tarix faniga “Musulmon Renessansi” tushunchasi taniqli Аvstriya sharqshunosi Аdam Mets (1876-1946) tomonidan XX asr boshlarida, yanada aniqrog‘i, 1909-yilda kiritilgan. Olim “Sharq” atamasini tarixiy mazmunda ishlatib, bunda O‘rta yer dengizidan to Yevropa qitʼasigacha (subkontinentgacha) bo‘lgan yurtlarni va bu hududlarda IX-XII asrlarda madaniyat yuksaklarga ko‘tarilganligini ko‘zda tutgan. Mazkur o‘lkalar qadimiy sivilizatsiya beshigidir.
