Moldaviya Respublikasi

80-yillarning oxirida Moldovada umuman moldovaliklar aholining 64 foizini tashkil etdi, ilgarigi muxtoriyat – Dnestrbo’yida esa aholining ko’pchiligi – 60 foizi ruslar va ukrainlardan iborat edi. Bu mintaqalar o’rtasidagi farqlar mamlakat taqdiriga ta’sir ko’rsatdi. Boltiqbo’yidagi xalq frontlari harakati, keyinchalik esa Ruminiyadagi inqilob haqidagi xabarlar Yagona Moldova Xalq Frontining (YaMXF) tashkil etilishiga, uning tomonidan mamlakatda 1989-yilda rumin tiliga davlat tili maqomini berish va mamlakatni suveren deb e’lon qilishga bo’lgan intilishlarni rag’batlantirdi. YaMXF ommaviylashdi va Kishinyov ko’chalariga yuz minglab tarafdorlarini chiqardi.