Xalqaro iqtisodiy muzokaralarning hujjatlari

“Xalqaro iqtisodiy muzokaralar” tushunchasi o’zida eksport hajmini oshirish, xorijiy invеstitsiyalarni jalb qilish va xalqaro iqtisodiy tashkilotlar ishida ishtirok etish, ya’ni mamlakatning iqtisodiy manfaatlarini xalqaro miqyosda ilgari surishga yo’naltirilgan rasmiy muzokaraviy faoliyatni mujassam etadi.
Xalqaro iqtisodiy muzokaralarda davlatlar vakillari iqtisodiy masalalarni hamda ikki tomonlama va ko’p tomonlama munosabatlarga oid boshqa muammolarni rasmiy muhokama qilishadi . Bundan ko’zlangan asosiy maqsad iqtisodiy, siyosiy strategiya va taktikani yoki tegishli diplomatik tadbirlarni o’zaro kelishib olish, fikr almashish, shartnomalarni tayyorlash va tuzish, nizoli muammolarni hal etish va boshqalardan iborat. Xalqaro iqtisodiy muzokaralar qatnashchilari lavozimi (davlat boshlig’i, hukumat boshlig’i, tashqi ishlar vaziri va h.k.) muhokama etiladigan muammolarning ahamiyati bilan belgilanadi. Umuman olganda huquqiy hujjatlarga asosan davlat boshlig’i, hukumat boshlig’i, tashqi ishlar vaziri xalqaro iqtisodiy muzokaralarni yuritish va maxsus vakolatlarsiz xalqaro shartnomalarni imzolash huquqiga egadirlar. Boshqa rasmiy shaxslar xalqaro iqtisodiy muzokaralarni yuritish va yakunlovchi hujjatlarni imzolash uchun tegishli tarzda rasmiylashtirilgan vakolatlarga ega bo’lishi shart.