O’zbekiston Respublikasining «O’zbekiston Respublikasining Markaziy banki to’g’risida»gi, «Banklar va bank faoliyati to’g’risida»gi, «Mikromoliyalash to’g’risida»gi, «Tadbirkorlik faoliyati erkinligining kafolatlari to’g’risida»gi qonunlari hamda O’zbekiston Respublikasi Prezidentining 2017 yil 8 avgustdagi PQ-3182-son «Hududlarning jadal ijtimoiy-iqtisodiy rivojlanishini ta’minlashga doir ustuvor chora-tadbirlar to’g’risida»gi qaroriga asosan aholi bandligini ta’minlash uchun tijorat banklari tomonidan mikrokreditlar ajratish tartibini belgilaydi.
Mazkur Nizomda quyidagi asosiy tushunchalardan foydalaniladi:
tavsiyanoma – O’zbekiston Respublikasi Prezidentining 2017 yil 8 avgustdagi PQ-3182-son «Hududlarning jadal ijtimoiy-iqtisodiy rivojlanishini ta’minlashga doir ustuvor chora-tadbirlar to’g’risida»gi qaroriga asosan quyidagi shaxslar tomonidan taqdim etilishi lozim:
– tuman (shahar)larda tashkil etilgan sektorlarning tegishli rahbari;
– tuman (shahar) hokimining o’rinbosari – xotin-qizlar qo’mitasi;
– fuqarolarning o’zini o’zi boshqarish organlari raisi.
qarz oluvchi – tavsiyanoma berilgan muayyan mehnat turlari bilan shug’ullanish istagida bo’lgan fuqaro;
bank – O’zbekiston Respublikasi Markaziy banki tomonidan belgilab berilgan, qarz oluvchilarga mikrokreditlar ajratadigan tijorat banki.
