Biznes reja quyidagi tarkibiy qismlarni o’z ichiga oladi:
1. Loyihaning maqsadi
2. Loyihaning qiymati
3. Tashkiliy reja
4. Ishlab chiqarish rejasi
5. Moliyaviy reja
6. Xulosa
LOYIHANING MAQSADI
Ushbu loyihani amalga oshirishdan maqsad, makaron mahsulotlarini ishlab chiqarish biznesini tashkillashtirishni asoslashdir.
Tadbirkor belgilangan faoliyat turiga asoslanib, ko’zlangan mahsulotlarni sotib olib, yetishtirib xalqimizga arzon va sifatli tarzda, yetkazib berish hamda 7 nafar kishini ish bilan ta’minlashni o’z oldiga maqsad qilib qo’ygan.
Makaron mamlakatimizda allaqachon odatiy va sevimli qo’shimcha taomga aylangan. Makaron mahsulotlarining asosiy afzalligi ularning arzonligi va tez tayyor bo’lishida. Bundan tashqari, makaronlarning “obro’”si ham ortib bormoqdaki, bunda makaron mahsulotlari ishlab chiqaruvchilarning hissasi katta. Agar avvallari makaron uncha foydali ovqat hisoblanmay, parhez tutayotgan kishilarga tavsiya etilmagan bo’lsa, endilikda ular asta-sekin foydali ozuqa sifatida e’tirof etilmoqda va bunga italyan toamlariga bo’lgan qiziqish ham sabab bo’lmoqda.
Makaron ishlab chiqarish biznesi bir necha yil avval juda serdaromad hisoblanar edi. Makaron ishlab chiqarish bo’yicha sex tashkil etish uchun nisbatan kam mablag’ talab etiladi. Makaron mahsulotlari ishlab chiqarish texnologiyasi nisbatan sodda. Bunday biznesning o’zini oqlash muddati katta emas, rentabelligi esa yuqori (oddiy davrda 30 foiz va “zamon og’ir” kelganda – 80 foiz). Shu sababdan, bu bozor ishtirokchilari soni har yili uch-to’rt marta ortib borayotganining hayron qolarli joyi yo’q.
